യുഎസ് പ്രസിഡന്റ് ഡൊണാൾഡ് ട്രംപ് നാല് ദിവസത്തെ മിഡിൽ ഈസ്റ്റ് പര്യടനത്തിന്റെ തുടക്കമായി സൗദി അറേബ്യയിലെ റിയാദിൽ എത്തി. കിംഗ് ഖാലിദ് അന്താരാഷ്ട്ര വിമാനത്താവളത്തിൽ സൗദി കിരീടാവകാശി മുഹമ്മദ് ബിൻ സൽമാൻ നൽകിയ ഔപചാരിക സ്വീകരണത്തോടെ, ഈ സന്ദർശനം രണ്ട് രാജ്യങ്ങൾ തമ്മിലുള്ള സാമ്പത്തിക ബന്ധങ്ങളുടെ ഊഷ്മളത പ്രതിഫലിപ്പിക്കുന്നതായി. ട്രംപിന്റെ സൗദിയിലെ ആദ്യ ദിവസം തന്നെ നടന്ന സൗദി-യുഎസ് നിക്ഷേപ ഫോറം പ്രമുഖ യുഎസ് ബിസിനസ് വ്യക്തിത്വങ്ങളെയും വ്യവസായിളേയും ഉദ്യോഗസ്ഥരെയും ഒരുമിപ്പിച്ച വേദിയായി മാറി. ട്രംപിന്റെ ഈ സന്ദർശനം സൗദി അറേബ്യയുടെ ആഗോള സാമ്പത്തിക പങ്കാളിത്തത്തിന്റെ ഒരു നിർണായക ഘട്ടമാണ്.
സൗദി-യുഎസ് നിക്ഷേപ ഫോറം സൗദി അറേബ്യയുടെ സാമ്പത്തിക വൈവിധ്യവൽക്കരണത്തിന്റെ ഭാഗമായി, സാങ്കേതികവിദ്യ, നിർമിത ബുദ്ധി, ഊർജ്ജം, ഡിജിറ്റൽ ഇൻഫ്രാസ്ട്രക്ചർ, ഫിൻടെക്, ഹെൽത്ത്ടെക്ക്, ടൂറിസം, സ്മാർട്ട് മൊബിലിറ്റി തുടങ്ങിയ മേഖലകളിൽ ശ്രദ്ധ കേന്ദ്രീകരിച്ചായിരുന്നു. ട്രംപിന്റെ പര്യടനത്തിന്റെ ഭാഗമായി, സൗദി ഉദ്യോഗസ്ഥരുമായുള്ള ഉച്ചവിരുന്നിൽ 31 പ്രമുഖ യുഎസ് ബിസിനസ്, ടെക് വ്യക്തിത്വങ്ങൾ പങ്കെടുത്തു.
ട്രംപിനൊപ്പം സൗദിയിലെത്തിയ പ്രമുഖർ
ട്രംപിനൊപ്പം യുഎസ് വ്യവസായ മേഖലയെ പ്രതിനിധീകരിച്ച് വമ്പൻമാരുടെ ഒരും സംഘം തന്നെ ഉണ്ടായിരുന്നു. യുഎസ് ഭരണകൂടത്തിലെ മുതിർന്ന ഉദ്യോഗസ്ഥരും സംഘത്തിലുൾപ്പെടും. വിദേശകാര്യ സെക്രട്ടറി മാര്‍ക്കോ റുബിയോ, പ്രതിരോധ സെക്രട്ടറി പിറ്റ് ഹെഗ്‌സെത്ത്, ട്രഷറി സെക്രട്ടറി സ്‌കോട്ട് ബെസെന്റ്, വാണിജ്യ സെക്രട്ടറി ഹോവാഡ് ലുറ്റ്‌നിക്, ഊര്‍ജ സെക്രട്ടറി ക്രിസ് റൈറ്റ് എന്നിവരാണ് സര്‍ക്കാരിനെ പ്രതിനിധീകരിച്ച് സംഘത്തിലുണ്ടായിരുന്ന പ്രമുഖര്‍. ട്രംപിനെ അനുഗമിച്ച പ്രമുഖ ബിസിനസ് വ്യക്തിത്വങ്ങൾ ഇവരാണ്:
- ഇലോൺ മസ്ക്: ടെസ്‌ല, സ്‌പേസ്‌എക്‌സ് സിഇഒ, ട്രംപിന്റെ പ്രധാന ഉപദേശകൻ.
- സ്റ്റീഫൻ ഷ്വാർസ്മാൻ: ബ്ലാക്‌സ്റ്റോൺ ഗ്രൂപ്പ് സിഇഒ.
- ലാറി ഫിങ്ക്: ബ്ലാക്‌റോക്ക് സിഇഒ.
- ബെൻ ഹോറോവിറ്റ്സ്: ആൻഡ്രീസെൻ ഹോറോവിറ്റ്സ് സഹസ്ഥാപകൻ.
- സാം ആൾട്ട്മാൻ: ഓപ്പൺഎഐ സിഇഒ, എഐ രംഗത്തെ പ്രമുഖൻ.
- ജെനി ജോൺസൺ: ഫ്രാങ്ക്ലിൻ ടെമ്പിൾടൺ ഇൻവെസ്റ്റ്‌മെന്റ് സിഇഒ.
- അർവിന്ദ് കൃഷ്ണ: ഐബിഎം സിഇഒ.
- ജെയ്ൻ ഫ്രേസർ: സിറ്റിഗ്രൂപ്പ് സിഇ.
- മൈക്കൽ ഒ’ഗ്രാഡി: വെൽത്ത് മാനേജ്‌മെന്റ് നോർത്തേൺ ട്രസ്റ്റ് സിഇഒ.
- കെല്ലി ഓർട്ട്ബെർഗ്: ബോയിംഗ് സിഇഒ.
- റൂത്ത് പോറാറ്റ്: ഗൂഗിൾ സിഐഒ.
- ആൻഡി ജാസി: ആമസോൺ സിഇഒ.
- ജെൻസൻ ഹുവാങ്: എഐ ചിപ്പ് നിർമാണ കമ്പനിയായ എൻവിഡിയ സിഇഒ.
- അലക്സ് കാർപ്: പലന്റിർ സിഇഒ.
- ലോറൻസോ സിമോനെല്ലി: ബേക്കർ ഹ്യൂസ് സിഇഒ.
- ജെഫ് മില്ലർ: ഹാലിബർട്ടൺ സിഇഒ.
- ഒലിവിയർ ലെ പ്യൂഷ്: ഷ്‌ലംബർഗർ സിഇഒ.
- ദിന പവൽ: ബിഡിറ്റി & എംഎസ്ഡി പാട്‌നേഴ്‌സ് വൈസ് ചെയർമാൻ.
- റേ ഡാലിയോ: ബ്രിഡ്ജ്‌വാട്ടർ അസോസിയേറ്റ്സ് സ്ഥാപകൻ.
- മാർസെലോ ക്ലോർ: ഷീൻ ഫാഷൻ സംരംഭകൻ
- ട്രാവിസ് കലനിക്ക്: ഉബർ സ്ഥാപകൻ.
- നീൽ ബ്ലൂ: ജനറൽ അറ്റോമിക്സ് ചെയർമാൻ.
- ജോൺ ബാലിസ്: കിർക്ലാൻഡ് & എല്ലിസ് സർവീസസ് ചെയർമാൻ.
- ജേക്ക് സിൽവർസ്റ്റൈൻ: എൻഫീൽഡ് ഇൻവെസ്റ്റ്‌മെന്റ് പാർട്‌നേഴ്‌സ് സിഇഒ.
- ടിം സ്വീനി: എപിക് ഗെയിംസ് സിഇഒ.
- കാത്തി വാർഡൻ: നോർത്രോപ്പ് ഗ്രുമ്മൻ സിഇഒ.
- ജെയിംസ് ക്വിൻസി: കൊക്ക-കോള സിഇഒ.
- ദാര ഖോസ്റോഷാഹി: ഊബർ സിഇഒ.
- ഫ്രാൻസിസ് സുവാരസ്: മിയാമി മേയർ.
- വില്യം ഒപ്ലിംഗർ: അൽകോവ സിഇഒ.
- വില്യം മീനി: അയൺ മൗണ്ടൻ സിഇഒ.
സൗദി-യുഎസ് നിക്ഷേപ ഫോറത്തിന്റെ പ്രാധാന്യം
സൗദി-യുഎസ് നിക്ഷേപ ഫോറം സാങ്കേതികവിദ്യ, നിർമിത ബുദ്ധി, ഊർജ്ജം, ഡിജിറ്റൽ ഇൻഫ്രാസ്ട്രക്ചർ, ഫിൻടെക്, ഹെൽത്ത്ടെക്ക്, ടൂറിസം, സ്മാർട്ട് മൊബിലിറ്റി എന്നീ രംഗങ്ങളിൽ 30,000 കോടിയിലധികം ഡോളർ മൂല്യമുള്ള കരാറുകൾ ഒപ്പുവെക്കാൻ കാരണമായി. ഇത് 60,000 കോടി ഡോളറിലെത്തിക്കുമെന്നും ഒരു ട്രില്യൺ ഡോളറിന്റെ നിക്ഷേപ സാധ്യതകളുണ്ടെന്നും കിരീടാവകാശി മുഹമ്മദ് ബിൻ സൽമാൻ രാജകുമാരൻ പ്രഖ്യാപിച്ചു. ഈ ഉച്ചകോടി സൗദി അറേബ്യയുടെ ആഗോള സാമ്പത്തിക നേതൃത്വത്തെ ശക്തിപ്പെടുത്തുന്നതായി.
നിക്ഷേപ ഫോറം, സൗദി അറേബ്യയുടെ എണ്ണ-അധിഷ്ഠിത സമ്പദ്‌വ്യവസ്ഥയെ വൈവിധ്യവൽക്കരിക്കാനുള്ള വിഷൻ 2030 പദ്ധതിയുടെ ലക്ഷ്യങ്ങളുമായി യോജിച്ചുള്ളതാണ്. ട്രംപിന്റെ സന്ദർശനവും നിക്ഷേപ ഫോറവും, സൗദി അറേബ്യയുടെ സാമ്പത്തിക പരിവർത്തനത്തിന്റെ ഒരു നിർണായക ഘട്ടത്തെ അടയാളപ്പെടുത്തുന്നു. യുഎസിന്റെ പിന്തുണയോടെ, വിഷൻ 2030, സൗദിയെ ഒരു ആഗോള നവീന കേന്ദ്രമായി മാറ്റുന്നു, ഒപ്പം യുഎസിന് പുതിയ വിപണികളും തൊഴിലവസരങ്ങളും തുറക്കുന്നു.